Ոստայնասնկերը` (սարդոստայնասնկեր — Cortinarius) ագարիկոմիցետների ամենատարածված ցեղերից են և հանդիպում են տարբեր տիպերի խոնավ անտառներում՝ հողի վրա։ Միկորիզա գոյացնող սնկերից են և համակեցության մեջ են մտնում բազմաթիվ ծառատեսակների հետ։
Cortinarius գիտական անվանումը ծագել է լատիներեն Cortina բառից, որը թարգմանվում է որպես «քող, ծածկոց»։ Վերջինս շատ նուրբ թաղանթ է, սարդոստայնանման մանրաթելերից կազմված, որը գտնվում է գլխարկի եզրի և ցողունի միջև։ Դա ցեղի բոլոր տեսակների ընդհանուր առանձնահատկությունն է, որը տեսակների մեծ մասի մոտ ժամանակավոր է և չի պահպանվում։
Այս ցեղը լայնորեն տարածված է ամբողջ աշխարհում։
Աճում են ամառվա վերջից մինչև ուշ աշուն։
Բազմաթիվ անուտելի և մահացու թունավոր տեսակներից բացի, կան նաև ուտելի տեսակներ, որոնք սակայն շատ դժվար է տարբերել։ 
Թունավոր տեսակները պարունակում են դանդաղ գործող տոքսիններ որոնցով թունավորման ախտանիշները կարող են ի հայտ գալ ուտելուց 7-15 օր հետո, երբ բուժումը սովորաբար այլևս արդյունավետ չէ։
Այս ցեղի որոշ տեսակներ օգտագործվում են ներկանյութերի ստացման մեջ։